حبيبتي .. فستانها اتقطع ..
والذنب مش ذنبي ..
حبيبتي خطفها الجدع ..
وكانت زى القمر جنبي ..
حبيبتي عروسة ..
حبيتها من قلبي ..
حبيبتي محروسة ..
غزلت فستانها بدمي ..
حبيبتي فستانها انقطع ..
والذنب مش ذنبي ..
غيرها كتير انخدع ..
ويا ريتها طاوعتني ..
فَكَرت الجدع جدع ..
ونسيت عهدها وحبي ..
عقدها الألماظ انفرط ..
بكيت أنا من غلبي ..
سوارها الدهب انسرق ..
مدت ايدها ليدي ..
وقف مابيننا الجدع ..
قطع فستانها الفضه ..
سترتها بتوبي ..
وقعت من الخضة ..
بكيت أنا محبوبي ..
نطق لساني كفايه ..
عذابها وهواني كفايه ..
خليها ياجدع ويايه ..
دي دنيتي ومنايا ..
باعها الجدع في المزاد ..
ويا مين يشتريها ..

وأنا اللي طول عمري
يا ناس شاريها ..
بايع عمري عشان عينيها ..
روحي فدا تراب رجليها ..
جريت يا خال لجل ما أحميها ..
ما قدرتش يا خال أوصل ليها ..
صرخت بيعوني أنا وسيبوها ..
بيعوني أنا والحلوة خلوها ..
رموني بعيد ومسكوها ..
صحيح يا خال
مين يشتري غلبان ..
ستر حبيبته وبقى هو عريان ..
حبيبتي توبها اتقطع ..
والذنب مش ذنبي ..
سلمت روحها لجدع ..
ونسيت عهدها وحبي ..
وفي ليلة خان الجدع ..
وباعك يا حبيبتي ..
يا ما كتير انخدع ..
يا خسارة ياحبيبتي ..
قدام عيوني باعوكي بالكيلو ..
ولحمك الغالي بالرخيص بيشيلو ..
لطمت أنا خدي ..
لطمت من خيبتي ..
لا قدرت أحافظ عليك
ولا انت حتى قدرتي ..
يا خسارة يا حبيبتي ..
بالرخيص باعوكي يا حبيبتي ..