فى وسط المدينة ناس كتيير موجودين
[center]اللى قاعد قدام اكل عيشه مستنى رزقه

اللى واقف مستنى واللى ماشى بيغنى

ناس كتير من غفير لوزير

اللى فرحان واللى زعلان

اللى خايف واللى قلقان

وفى وسط كل دا حضرت مشهد فى وسط المدينة





ايوه يا بيه

مالك كده بتبصلى وباستحقار

ايوه انت بكلمك

فيا ايه مش عاجب سيادتك

شكلى مش ولا بد ؟

معلش

مش ذنبى

انا مبعضش متخفش

مضايق منى ليه

هو انا عملتلك ايه

بتبصلى بطرف عنيك كده ليه

انا كافى خيرى شرى

مش قاعد هنا منظرة

لأ دا الرصيف دا هو بيتى

والحجر دا هو سريرى

وفى الاخر هيبقى بالنسبة لى مقبرة

صدقنى انا مش صايع

بس مفيش ولو عشة تضمنى

يا بيه انا مش عايز شقة ع النيل

ولا فيلا ع البحر

انا راضى كده وخلاص اتعودت

هشكى واتذل و فى الاخر اتحبس واتمرمط

طب ليه

يلبسونى 100 جريمة

متشرد وصايع عيل ملووووش قيمة

متعجب انى باكل من الزبالة ؟

معلش يا بيه هى مش وحشة اوى كده

دى حاجات كنت بتاكل منها من شوية

بس طلعت عليك بزيادة

قولت اشوفها انا بدال ماتترمى خسارة

مبقولش عايز بيتزا ولا وجبات كنتاكى

صدقنى متبصليش كده بس وانا هبقى راضى

انا مظلوم والظلم وحش







لبسى مش عاجبك انا عارف

بس تصدق دا برضو لقيته فى الزبالة

معجبش ابن سيادتك

لونه بقى باهت شويتين

وفيه قطع هيبوظ المنظر والروتين

قولت انا اولى بيه من النار

بتقولى اروح اشتغل مش مستنيك تنصحنى

روحت و اشتغلت

انضحك عليا وانضربت

البيه اللى زيك مستخسر يدينى حسابى

مانا مليش حد فى الدنيا دى يجبلى حقى

وعلى فكرة انت كمان ظالمنى

ماهو اكيد حد زيك هو السبب فى همى

وطول النهار يظهروا ملايكة ع الشاشات

ومجرد ماينزلوا يقفلوا ازاز العربيات

مش عايزين يشوفوا شكلنا

وقال ايه كانوا من شوية بيدافعوا عننا

ايشى جمعيات وايشى مقابلات و مؤتمرات

كفاية بقى حرام عليكم

سيبونا فى حالنا

مش كل واحد بيبقى قاعد عند ابوه ؟

وانتم سميتونا اطفال شوارع

خلاص بقى خلونا مع ابونا

حلوا عن سمانا ,, ارجوكم ارحمونا

وفى وسط المدينة

مشيت كمان وكمان

عديت شارع ورا شارع








وعلى باب بيت شوفت حد معرفوش

بس غريبة حاسس انى اعرفه من زمان

ملامحه مش طبيعية

دى رسمت لوحه كاملة عنوانها آلااااام







مالك يا فلان ؟

مكملتش السؤال وزى مايكون ما صدق الغلبان

وقال دا الكلام

قاعد زعلان زهقان

ومحدش حاسس بهمى

اعمل ايه بس ياربى

لوحدى ومحدش جمبى

قولت لأ هنزل

اقف وامشى واجرى

وكل الناس حواليا

هياخدونى بالحضن ويحلفوا 100 يمين

والله لو مجيتش معانا ما احنا ماشيين

فينك اخبارك عامل ايه

وحشتنا جدا يا ابن الايه








ونروح فى كل مكان

نجرى نلعب نتمشى

شوية جد وشوية هزار و كمان نتعشى

وحلوة الدنيا يا محلاها

مع احلى صحاب الهموم دى انساها

وبأعلى صوت قاطعته وفى وشه قولتهاله

هما مين وفييييين ؟

اصحى فوق وبطل احلام

سيبك بقى من دى اوهام

بص لفوق

القمر لوحده

عمرك شوفته فى يوم زعلان ؟







ساعتها قال الغلبان

فعلا دى طلعت اوهام

حلم فى ثانيه حلمته

صحيتنى منه ليه الله يجازيك

كنت سيبنى كده شوية الله يخليك

بس استنى عندك

ايوه القمر زعلان

مع انه النجوم جمبه فى السما الوان

مشكله مع بعضها احلى بستان

وسايبينه لوحده المسكين

وحيد غضبان حزين

ومتفكرش نوره دا فرحه منه

دا جايبه من الشمس غصب عنه !







ساعتها سكت وبصلى الغلبان

اصل ملطعش لوحده

دا طلعت انا كمان

بصيتله وقولت انا همشى واجرى

وبعدها افتكرته

دا كان صديق عمرى !






________________________________________



وكملت تانى فى وسط المدينة

وناس كتييير مروحين

وشوفت مواقف تانية كتيرة

ام شهيد وحشها ابنها

طفلة صغيرة بتلعب وفرحانة ومحدش قدها

حبيب بيبص على فرح اخر الشارع

فجاه عنيه دمعت

عرفت انه فرح حبيبته

وبكده حكايته انتهت

بس حكايتنا مش انتهت

وكل موقف وكل مشهد له حكاية

بس كفاية المرة دى

ونتقابل المرة اللى جاية ...

فى وسط المدينة