موضوع: عدل مفاهيمك يا لاعب كمال الاجسام الإثنين 04 يوليو 2011, 1:03 pm
عدل مفاهيمك يا لاعب كمال الاجسام
إلى لاعب بناء الاجسام الميزان له كفتين
كام واحد فينا سأل نفسه .. انا ليه بلعب بناء اجسام حد فكر إيه السبب الرئيسى فى اللى خلاه يلعب اللعبة دى
شوفت رونى كولمان ولا بطل من ابطال العالم وعجبتك ضخامته العضلية شوفت مسابقة أقوى رجل فى العالم وبعدها قررت تدخل عامل بناء الاجسام لإكتساب القوة العضلية شوفت واحد بيلعب حديد بيضرب واحد اقل منه بإفترا فحبيت تكون زيه او ماحبتش تكون زى اللى بينضرب
* لاقيت واد لابس بودى فى الشارع وعامل زى الدبابه فيه وماشى فارد مجانصه زى الطيارة الجامبو ومعرضها على خلق الله والناس عماله تبصله بتعجب وليس " إعجاب " * ولا علشان جتلك معلومة ان الواد الفورمة البنات بتتلم حواليه * ولا سمعت اساطير ان لاعبى كمال الاجسام عندهم قوة جنسية فشر عنتر " معلومة خاطئة "
* ولا اخترتها فعلا كرياضه بتحافظ على لياقة الجسم والتناسق والمظهر العام وزيادة الصحة واللياقة وفوايدها التانية الكتير بعيدا عن كل اللى سبق ؟! * مش هانتكلم كتير وصارح نفسك !
أولا لازم نفهم يعنى ايه بناء اجسام بناء اجسام انى بهتم بتقوية وبناء كل عضلة فى جسمى بما يناسب قدرتى وطولى ووزنى إلخ بناء الاجسام انى بعمل جسم متناسق مناسب بردو لطولى وجسمى ومظهرى علشان اوصل لأجمل شكل جسم اقدر اوصلو
نيجى بقى للحقيقة اللى احنا بنهرب منها
كتييييييييير مننا اوى بعد عن مفهوم الرياضة فى لعبة بناء الاجسام بقت الغرض هو ضخامة عضلية وباى اد الشمامة وصدر متر ادام وظهر اعرض من العربية الشيفروليه الجامبو وفخدة رجل لو اتعلقت عند الجزار تأكل الدويقة كلها " مع ان الاغلب بيهمل عضلة الرجل فى التمرين علشان مابتتعرضش ههههههههههه "
اولا يا شباب باللهى عليكو استوعبو الكلمتين دول
كل واحد فينا ربنا خلقو فى جسم معين وبشكل معين وبطبيعه معينه وقدرات معينه وطول وعرض وسماكة عضم معينه وعوامل وراثية وطبيعه الياف عضلية وقدرات جسمانية بتختلف عن شخص لاخر يعنى انت لو شوفت واحد صاحبك جسمه اقوى منك او عضله اكبر منك او او او دى كلها بترجع لطبيعه الجسم مش اكتر وزى ما هو فيه مميزات انت كمان فيك مميزات
نيجى بقى للجيم .. تلاقى شاب دخل عليك غالبا رفيع او جسمه مش كبير اوى .. ومع اول اسبوع تمرين يا كابتن .. اخد بودر ايه وحقن ايه .. ليه يا حبيبى ؟
عاوز ابقى ضخم .. عاوز تبقى ضخم ليه يا ضنايا ..؟ عاوز ابقى فورمة وحلو ومش عارف ايه وايه وايه طب مش تصبر الاول يا مان لما تدوس شوية فى التمرين مع نظام اكل ونشوف جسمك هاتكون ردة فعله ازاى يمكن جسمك يعجبك وماتحتاجش لحاجة من دى ..
نيجى بقى للسبب الرئيسى لأى سؤال من النوعية دى
" الإستعجااااااااااااااااااااااااااااااااااااااااااا ااااااااااااااااااال " محدش بيصبر على التمرين كله داخل من يومين عاوز يبقى ديكستر جاكسون .. يا شباب مافيش سباح بيبقى سباح من يومين ولا بطل كونغ فو بيبقى بطل من شهر ولا شهرين .. ولا ملاكم محترف بيبقى محترف غير لما يكون اخد علق بعدد شعر راسه
.. فبتبقى النتيجة زى اللى بنا عمارة بسرعه بسرعه بسرعه وماستناش لما الاسمنت ينشف وياخد راحته وهوب فى الاخر وقعت فوق دماغه
يا شباب ادو فرصو لجسمكو يستقبل التمرين واحدة واحدة واصبر معاه اعمل لنفسك جدول غذائى كويس يناسبك وامشى عليه طور علمك فى التغذية واقرأ فى التشريح العضلى للجسم علشان تعرف انت بتمرن ايه ولما عضله تقصر معاك تعرف تعالجها ازاى
اعرف كل تمرين فى بيعمل ايه فى العضلة
اعرف بقى حاجة مهمة اوى
وزن الجسم المثالى بيبقى طول الجسم ناقص 100 بالنسبه للاعب كمال الاجسام انا بشوف ان اجمل فورمة بتتعمل لما تكون الزيادة مش فوق ال 10 كيلو ومش تحت الوزن المثالى ويكون عضل صافى على قد ما تقدر " اوعى تكون فرحان بجسمك وبضخامتك فى التيشرت
اى حد فرحان بجسمه ووقف ادام واحد فاهم بيقولو كلمه واحدة " إقلع ورينا فورمتك " طبعا ده يخلع فاكر نفسه وحش صدقونى بيضحك الناس عليه لا شكل ولا منظر ولا وتناسق ولا تشريخ عضلى وكل عضله عليها ادها وازيد منها شحم والحالة مزرية والموهوم فاكر نفسه بطل !! يا جدعان دى رياضة مش تسمين عجول ده المفروض انضف ناس بتاكل هم لاعبى بناء الاجسام علشان نسبة الشحوم اللى فى الجسم اما الكشرى على التونة والبطاطا اللى فى السمنه البلدى اللى عليها لبن وعسل كل ده كويس بس ما يتاكلش كده ولا بالطريقة دى بعض لاعبى كمال الاجسام فاكرين انه اى حاجة تتاكل وياكل على قد ما يقدر ولو مشى ولقى معزة فى الشارع يروح سالخها وحاطتها على سيخ وشاويها وياكل المعزة وياكل السيخ كمان
لا لا لا لا صححو المفاهيم .. النظام وانتقاء الاكل وتنظيم مواعيد الوجبات واحدد انا جسمى محتاج كارب ونشويات ولا محتاج بروتين اكتر مش الواحد يبقى معبى شحوم ونلاقيه بيضرب كشرى ومكرونة وعيش فينو غير بقى الحاجات التانية
واعرف ان اى وزن زيادة على جسمك بطريقة فوق المتوسطة ولو كان حتى عضل فهو عليك مش ليك اولا ساعة التمرين انت هاتجهد نفسك جامد اكل وتمرين خوفا من ان الوزن ده يضيع منك وزى ما احنا عارفين ان اكتساب الوزن سهل الحفاظ عليه صعب
ولو فرضنا انك قعدت من التمرين كل جرام زيادة عن وزنك الطبيعى هايتحول لشحم يتخزن تحت الجلد وكل ما زاد الوزن كل ما زادت الكارثه هاتضطر انك تعمل ريجيم تخس فيه كل ده بدل ما تبقى عندك تضاريس مش ظريفة
نقطة بقى مهممممممممممممممممة جدا جدا جدا رياضة بناء الاجسام رياضة مش متكاملة لازم يكون جنبها يا جرى يا سباحة على فترات قصيرة علشان تقوى التنفس وتقوى قلبك وتعمل لجسمك قوة تحمل اللى فاكرين ان لعيبه كمال الاجسام عندهم صحة خللى اى واحد فيهم يجرى ولا يعوم تلاقيه قطع نفس وقلبه هاينط منه لأن مافيش لياقة
كمال الاجسام بيعمل قوة ولكن ليست قوة تحمل بيعمل قلب قوى ولكن معندوش قوة تحمل والنفس بيكون ضعيف جدا لانك غالبا بتحبس نفسك اثناء التمرين وده غلط او بتحمل على نفسك فترة قصيرة جدا وهى فترة تحميل الوزن لا اكثر
لازم يكون الجرى او السباحة بتدعم كمال الاجسام على الاقل مرة فى الاسبوع
وشوف الفرق حتى فى التمرين ذاته
والسويدى كمان مهم جدا جنب التمرين ومفعولو رائع
كلمة اخيرة بعد الرغى ده كله
أجمل جسم هاتوصلو وتقدر تحافظ عليه هو الجسم اللى انت هاتبنيه من غير هرمونات و منشطات وبالاكل الطبيعى وده هاتلاحظو ان متعاطى المنشطات اول ما بيقعدو من التمرين يا بيخسو بسرعه اوى أو بيفشولو حسب كل واحد ونظام اكله وبطل ازاى مره واحدة ولا تدريجيا
اما الشاب اللى بيعتمد على الاكل الطبيعى حتى لو وزنه نزل او بطل بيكون جسمه لسه فيه فورمة ولما بيرجع التمرين بيرجع اسرع من الاتنين اللى سابق ذكرهم
واللى فاكر انه لما يعمل جسم البنات هاتجرى وراه احب اقولو ان البنات عاوزة راجل مش حيطة او منظر ولو انت قبلت على نفسك انك تكون مجرد منظر دى بقى حاجة ترجعلك
اللى فاكر ان بناء الاجسام فتونة احب اقولك لو انت 100 كيلو عضل ووقف ادامك شاب 75 كيلو بيلعب بوكس هاينسيك تاريخ ميلادك فى ظرف دقيقة وربع
لو بتلعب بناء اجسام لغرض الافتخار والتكبر فتذكر قول الله بسم الله الرحمن الرحيم " إِنَّ اللّهَ لاَ يُحِبُّ مَن كَانَ مُخْتَالاً فَخُورًا" " ولا تمشي في الارض مرحا انك لن تخرق الارض ولن تبلغ الجبال طولا كل ذلك كان سيئه عند ربك مكروها"
موضوع: عدل مفاهيمك يا لاعب كمال الاجسام 
الإثنين 04 يوليو 2011, 1:03 pm
